ZYN Օգտահանման ծրագիր

1. ԿԱԶՄԱԿԵՐՊԻՉ

ZYN օգտահանման ծրագիր («Ծրագիր») կազմակերպվում է «ՖԻԼԻՊ ՄՈՐԻՍ ԱՐՄԵՆԻԱ» ՍՊԸ-ի («ՖՄԱ») կողմից։

2. ԾՐԱԳՐԻ ՆՊԱՏԱԿԸ

Ծրագիրը ՖՄԱ-ի կայուն զարգացման օրակարգի մի մասն է և նպատակ ունի խրախուսել շրջակա միջավայրի նկատմամբ պատասխանատու վարքագիծը՝ օգտագործված ZYN տուփերի հավաքման և պատասխանատու օգտահանման միջոցով։

3. ՍԱՀՄԱՆՈՒՄՆԵՐ

Ըստ Սույն Պայմանների և դրույթների՝

«Օգտագործված ZYN տուփ» նշանակում է ZYN-ի օրիգինալ տուփ, որից նիկոտինային բարձիկներն ամբողջությամբ օգտագործվել կամ այլ կերպ հեռացվել են, և որը Ծրագրի շրջանակում վերադարձվում է դատարկ վիճակում։

«Մետաղական տարա» նշանակում է բազմակի օգտագործման մետաղական տարա, որը տրամադրվում է համապատասխան պահանջներին բավարարող մասնակիցներին՝ Ծրագրի կայուն զարգացման նախաձեռնության շրջանակում վերաօգտագործումը և շրջակա միջավայրի նկատմամբ պատասխանատու վարքագիծը խթանելու նպատակով։

«Էլեկտրոնային տոմս» նշանակում է վիճակահանությանը մասնակցելու էլեկտրոնային գրառում, որը գրանցվում է ՖՄԱ-ի համակարգերում և տրամադրվում է համապատասխան պահանջներին բավարարող մասնակցին՝ կիրառելի մասնակցության պահանջները կատարելուց հետո։

4. ԾՐԱԳՐԻ ԺԱՄԱՆԱԿԱՀԱՏՎԱԾԸ

Ծրագրի ավարտից հետո ՖՄԱ-ն պարտավոր չէ ընդունել լրացուցիչ Օգտագործված ZYN տուփեր։ ՖՄԱ-ն կարող է իր բացառիկ հայեցողությամբ որոշել շարունակել, երկարաձգել, փոփոխել, կասեցնել կամ դադարեցնել Ծրագիրը՝ գործարար, գործառնական, իրավական, կարգավորող, համապատասխանության, բնապահպանական, կայուն զարգացման, անվտանգության կամ այլ ողջամիտ նկատառումներից ելնելով։

Եթե ՖՄԱ-ն հստակ չի հայտարարում Ծրագրի շարունակման կամ երկարաձգման մասին, Ծրագրի ժամանակահատվածից հետո հանձնված Օգտագործված ZYN տուփերը չեն համարվի Ծրագրին մասնակցելու, Էլեկտրոնային տոմսեր ստանալու կամ Ծրագրի շրջանակում որևէ պարգևի իրավունք ձեռք բերելու հիմք։

5. ՄԱՍՆԱԿՑՈՒԹՅԱՆ ԻՐԱՎՈՒՆՔ

Ծրագրին կարող են մասնակցել միայն այն ֆիզիկական անձինք, որոնք՝

ա) Հայաստանի Հանրապետության օրենսդրության համաձայն հասել են չափահասության տարիքին,

բ) ներկայումս նիկոտին պարունակող արտադրանքի օգտագործողներ են, և

գ) գրանցված են ՖՄԱ-ի սպառողների տվյալների բազայում։

6. ԳՐԱՆՑՈՒՄ

Ծրագրին մասնակցելու համար անհրաժեշտ է նախապես գրանցված լինել ՖՄԱ-ի սպառողների տվյալների բազայում։

Գրանցման և մասնակցության ընթացքում տրամադրված տեղեկատվությունը կարող է օգտագործվել, ներառելով, սակայն չսահմանափակվելով, հետևյալ նպատակներով՝

· Ծրագրի կառավարում,

· մասնակցության հետևում,

· մասնակցի կողմից Մետաղական տարայի ստանալու փաստի գրանցում,

· մասնակցին տրամադրված Էլեկտրոնային տոմսերի քանակի գրանցում,

· վիճակահանության անցկացում, և

· մասնակիցներին Ծրագրի, իսկ հաղթողին՝ պարգևի մասին տեղեկացում։

Ծրագրի հետ կապված հավաքվող և մշակվող անձնական տվյալները մշակվում են ՖՄԱ-ի Գաղտնիության ծանուցման և կիրառելի օրենսդրության համաձայն։

7. ՄԱՍՆԱԿՑՈՒԹՅԱՆ ՄԵԽԱՆԻԶՄԸ

Առաջին վավեր մասնակցություն

Մասնակիցը, որը Ծրագրի ժամանակահատվածում նախատեսված վաճառակետ է վերադարձնում երեք (3) Օգտագործված ZYN տուփ, ստանում է՝

· մեկ (1) Մետաղական տարա, և

· մեկ (1) Էլեկտրոնային տոմս, որը գրանցվում է ՖՄԱ-ի համակարգերում։

Յուրաքանչյուր մասնակից Ծրագրի ընթացքում իրավունք ունի ստանալու միայն մեկ (1) Մետաղական տարա՝ անկախ վերադարձված Օգտագործված ZYN տուփերի քանակից կամ այցելած հավաքման կետերի թվից։

Հետագա վավեր մասնակցություններ

Ծրագրին առաջին վավեր մասնակցությունից հետո ամեն անգամ, երբ մասնակիցը Ծրագրի ժամանակահատվածում վերադարձնում է ևս երեք (3) Օգտագործված ZYN տուփ, նա ստանում է մեկ (1) լրացուցիչ Էլեկտրոնային տոմս։

Մասնակիցները կարող են Ծրագրի ակտիվ լինելու ընթացքում կուտակել մի քանի Էլեկտրոնային տոմս։

Վերադարձված տուփերի նկատմամբ սեփականության իրավունքը

Նախատեսված վաճառակետ հանձնելու պահից բոլոր Օգտագործված ZYN տուփերը դառնում են ՖՄԱ-ի կամ նրա կողմից նշանակված Օգտահանման գործընկերոջ սեփականությունը և մասնակիցներին չեն վերադարձվում։

Պատասխանատու օգտահանում

Հավաքված բոլոր Օգտագործված ZYN տուփերը ՖՄԱ-ի կամ նրա կողմից նշանակված օգտահանման գործընկերների միջոցով կփոխանցվեն պատասխանատու օգտահանման և թափոնների կառավարման համար։

8. ԾՐԱԳՐԻ ԲՆԱՊԱՀՊԱՆԱԿԱՆ ԲՆՈՒՅԹԸ

Ծրագրին մասնակցությունը կամավոր է։

Ծրագրին մասնակցելու համար լրացուցիչ ZYN արտադրանք ձեռք բերելու պահանջ չկա։

9. ԷԼԵԿՏՐՈՆԱՅԻՆ ՏՈՄՍԵՐ

Յուրաքանչյուր վավեր Էլեկտրոնային տոմս համարվում է վիճակահանությանը մասնակցելու մեկ (1) հնարավորություն։

Էլեկտրոնային տոմսերը տրամադրվում և գրանցվում են բացառապես ՖՄԱ-ի համակարգերում։

Վեճի դեպքում մասնակցին տրամադրված Էլեկտրոնային տոմսերի հատկացման և քանակի վերաբերյալ ՖՄԱ-ի գրառումներն ունեն գերակա ուժ։

Էլեկտրոնային տոմսերը՝

չեն կարող վաճառվել, փոխանակվել, զիջվել կամ այլ կերպ փոխանցվել մեկ այլ անձի, և

չեն կարող փոխանակվել կանխիկ գումարի կամ որևէ այլ օգուտի դիմաց։

10. ՎԻՃԱԿԱՀԱՆՈՒԹՅՈՒՆ ԵՎ ՀԱՂԹՈՂԻ ԸՆՏՐՈՒԹՅՈՒՆ

Ծրագրի ժամանակահատվածի ավարտից հետո յոթ (7) օրացուցային օրվա ընթացքում ՖՄԱ-ն Ծրագրի ընթացքում տրամադրված բոլոր վավեր Էլեկտրոնային տոմսերի միջև կանցկացնի պատահական վիճակահանություն։

Համապատասխան պահանջներին բավարարող Էլեկտրոնային տոմսերի ընդհանուր քանակից պատահականության սկզբունքով կընտրվի մեկ (1) հաղթող։

ՖՄԱ-ն իրեն իրավունք է վերապահում սահմանելու վիճակահանության մեթոդաբանությունը և կազմակերպման կարգը՝ պայմանով, որ հաղթողն ընտրվի արդար և պատահական գործընթացի միջոցով։

11. ՊԱՐԳԵՎ

Հաղթողը կստանա բնության թեմայով փորձառության պարգև, որը նախատեսված է Ծրագրի բնապահպանական նպատակներին աջակցելու և դրանք նշանավորելու համար։

Պարգևը նախատեսված է անձամբ հաղթողի համար, փոխանցման կամ փոխանակման ենթակա չէ, և չի կարող փոխարկվել կանխիկ գումարի կամ փոխարինվել որևէ այլ ապրանքով, ծառայությամբ կամ օգուտով։

12. ՀԱՂԹՈՂԻ ԾԱՆՈՒՑՈՒՄ

Հաղթողը կտեղեկացվի SMS հաղորդագրության կամ զանգի միջոցով, որն ուղարկվելու է ՖՄԱ-ի սպառողների տվյալների բազայում գրանցված բջջային հեռախոսահամարին։

Եթե ընտրված հաղթողը՝

հինգ (5) օրացուցային օրվա ընթացքում կապ հաստատելու երեք (3) ողջամիտ փորձից հետո հասանելի չէ, կամ

հրաժարվում է պարգևից,

ՖՄԱ-ն կարող է անցկացնել նոր պատահական վիճակահանություն՝ այլ հաղթող ընտրելու համար։

13. ՍՏՈՒԳՈՒՄ ԵՎ ՈՐԱԿԱԶՐԿՈՒՄ

ՖՄԱ-ն իրեն իրավունք է վերապահում ցանկացած պահի ստուգելու մասնակցության իրավունքը և մասնակցության համապատասխանությունը։

ՖՄԱ-ն կարող է մերժել, անվավեր ճանաչել կամ որակազրկել ցանկացած մասնակցություն, եթե ողջամտորեն կարծում է, որ՝

տրամադրվել է կեղծ, ոչ ճշգրիտ կամ մոլորեցնող տեղեկատվություն, կամ

սույն Պայմաններն ու դրույթներն այլ կերպ խախտվել են։

14. ՊԱՏԱՍԽԱՆԱՏՎՈՒԹՅԱՆ ՍԱՀՄԱՆԱՓԱԿՈՒՄ

Կիրառելի օրենսդրությամբ թույլատրված առավելագույն չափով ՖՄԱ-ն պատասխանատվություն չի կրում՝

մասնակցի ոչ ճշգրիտ, թերի կամ հնացած տեղեկատվության,

ուշացած, ձախողված կամ չառաքված SMS ծանուցումների,

տեխնիկական, գործառնական կամ հեռահաղորդակցության խափանումների, կամ

ՖՄԱ-ի ողջամիտ վերահսկողությունից դուրս գտնվող և Ծրագրի կառավարման կամ պարգևի տրամադրման վրա ազդող հանգամանքների համար։

15. ՓՈՓՈԽՈՒՄ, ԿԱՍԵՑՈՒՄ ԿԱՄ ԴԱԴԱՐԵՑՈՒՄ

ՖՄԱ-ն իրեն իրավունք է վերապահում ցանկացած պահի փոփոխել, կասեցնել կամ դադարեցնել Ծրագիրը, եթե դա պահանջվում է օրենքով կամ պայմանավորված է գործարար, գործառնական, իրավական, կարգավորող, համապատասխանության, բնապահպանական, կայուն զարգացման, անվտանգության կամ այլ ողջամիտ նկատառումներով։

Ծրագրի ցանկացած էական փոփոխության մասին կտեղեկացվի ՖՄԱ-ի կողմից սահմանված հաղորդակցման ուղիներով։

16. ԿԱՐԳԱՎՈՐՈՂ ԻՐԱՎՈՒՆՔ

Սույն Պայմաններն ու դրույթները կարգավորվում և մեկնաբանվում են Հայաստանի Հանրապետության օրենսդրության համաձայն։

Ծրագրից բխող կամ դրա հետ կապված ցանկացած վեճ ենթակա է Հայաստանի Հանրապետության դատարանների բացառիկ ընդդատությանը։